Телото не треба да биде премногу топло предолго, бидејќи премногу топлина може да му наштети на вашиот мозок и на другите органи, според Националниот институт за здравје на САД.

Деновиве кога надворешната температура е екстремно висока, сите бараат начини како да се разладат и да се справат со неподносливите горештини. Без разлика дали поднесувате екстремна топлина или се обидувате да заштедите пари, постојат начини да се чувствувате удобно без вештачко ладење.

Потењето е природен систем за ладење на телото, но кога тоа е недоволно, постои зголемен ризик од развој на хипертермија предизвикана од топлината – чии знаци вклучуваат топлински грчеви, топлотен едем и топлотен удар.

Топлината во комбинација со високата влажност го зголемува овој ризик за здравјето, бидејќи нивото на заситеност на воздухот предизвикува потта да се насобира на кожата, спречувајќи го телото природно да се лади, јавува Би-би-си.

Останете хидрирани

Кога сте жешки и зацрвенети, хидратацијата е првиот и најважен чекор во разладувањето, вели Вендел Портер, професор по земјоделско и биолошко инженерство на Универзитетот Флорида. Температурата на водата не е важна бидејќи вашето тело ќе ја загрее, додал тој. Ако вашето тело страда од топлина и треба да се излади, тоа не може да го направи без одредена количина на влага, бидејќи телото се лади со потење.

Ладен туш или купка

Ладниот туш или купка помага во ладење на телото со намалување на внатрешната температура, рекол Портер. За дополнително разладување, обидете се со сапун од нане (пеперминт). Ментолот во маслото од нане ги активира мозочните рецептори кои му кажуваат на вашето тело дека нешто што јадете или чувствувате е ладно.

Покрај тоа, можете да користите и ладни крпи за перење на вратот или зглобовите. Ставете ладна крпа или ќесисчки за мраз на вашите зглобови или завиткајте ги околу вратот за да го разладите телото. Овие пулсни точки се области каде што крвните садови се блиску до кожата, така што побрзо ќе се разладите.

Само одморање во близина на вентилатор (не директно седење), исто така, ќе ја намали температурата на вашето тело.

Затворете ги завесите или ролетните

„Ако имате прозорци што се свртени во насоката на сонцето од утро до попладне, затворете ги завесите или ролетните за да „спречите сонцето директно да влезе во куќата и да ја загрее внатре“, порачува Портер.

Можете исто така да поставите завеси за затемнување за да ја изолирате просторијата и да го намалите порастот на температурата што би се случило во текот на денот.

Ако, пак, го вклучите клима-уредот, не го поставувајте на температура пониска од 21 степен за побрзо да ја разладите куќата, вели Саманта Хол, основач на австралиска компанија за истражување на дизајнот која помага да се создадат здрави, одржливи згради.

„Само за подолго да ја постигне таа температура и ќе продолжи сè додека не почнете да чувствувате студ и тогаш е тешко да воспоставите рамнотежа“, додава таа.

Наместо тоа, одржувајте ја температурата што е можно повисоко додека сè уште е пријатна.

Спијте во постелнина што дише

Памукот е еден од материјалите кои најдобро дишат, па памучните чаршафи или ќебиња можат да ви помогнат да се разладите во текот на ноќта.

„Колку е помал бројот на памучните конци, толку повеќе дише“, објаснил Портер.

Ова е затоа што поголем број на нишки има повеќе ткаења по квадратен сантиметар.

Уживајте во замрзнатите деликатеси

„Последниот и најсладок потенцијален начин да се ослободите од чувството на топлина е – сладолед. Но, не претерувајте со шеќерот ако сте прегреани или во опасност од прегревање“, вели Портер.

„Шеќерот би го забрзал вашиот метаболизам и ќе почнете да се чувствувате жешко однатре“, додал тој. „Значи, ладниот деликатес може да биде добра, но додадениот шеќер можеби не е“.