Два кинески нуклеарни бомбардери X-6 полетаа денеска на југот на Тајван, како дел од формацијата од вкупно девет авиони на кинеското воено воздухопловство кои летаа во зоната за воздушна одбрана на Тајван, соопшти Министерството за одбрана во Тајпеј.

Два бомбардери X-6 го прелетале каналот Баши, кој го дели Тајван од Филипините, а потоа се вратиле во Кина, додека други кинески воени авиони летале во близина на островот Пратас, кој е под контрола на Тајван, се вели во соопштението на тајванското министерство, пренесува Ројтерс.

Во меѓувреме, Кина денеска го спушти нивото на своите дипломатски односи со Литванија под нивото на амбасадори, како дополнителен одговор на одлуката на Вилнус да отвори дипломатско претставништво во Тајван, кој Пекинг го смета за своја територија.

Кина претходно го протера литванскиот амбасадор од Пекинг и го повлече својот амбасадор од Вилнус, сакајќи да ја нагласи чувствителноста на прашањето за статусот на Тајван.

Кинеското Министерство за надворешни работи ја обвини Литванија за „поткопување на суверенитетот и територијалниот интегритет на Кина“ и ја повика литванската влада „веднаш да ги исправи грешките“.

Кина бесна поради дипломатските односи меѓу Тајван и Литванија