Тензиите продолжуваат, Багдад го осуди палењето на Куранот пред ирачката амбасада во Данска
Багдад го осуди палењето на Куранот пред ирачката амбасада во Данска, истакнувајќи дека персоналот на данската амбасада во Багдад ја напуштил земјата по протестот, додека Копенхаген тоа го негира и тврди дека немало „повлекување од Ирак“.
Протестите избија низ Иран и Ирак откако Данска и Шведска дозволија палење на Куранот според правилата за заштита на слободата на говорот.
Демонстрантите во четвртокот ја запалија шведската амбасада во Багдад.
Двајца антиисламски демонстранти запалија примерок од муслиманската света книга пред ирачката амбасада во данската престолнина.
Ирачкото Министерство за надворешни работи ги повика властите на земјите од ЕУ „брзо да ја разгледаат таканаречената слобода на изразување и правото на протест“.
Демонстрантите се собраа во саботата во Багдад и покрај силното обезбедување, а мостовите кои водат до Зелената зона, во која се сместени голем број амбасади, беа затворени откако демонстрантите се обидоа да стигнат до данската амбасада.
Портпаролот на ирачкото Министерство за надворешни работи изјави дека персоналот на данската амбасада го напуштил Ирак пред два дена.
Тој не ја објасни причината или точниот момент на заминување.
Портпаролката на данското Министерство за надворешни работи изјави дека амбасадата во Багдад е затворена поради летен одмор од 22 јули.
„Не се повлековме од Ирак“, рече таа, одбивајќи да одговори дали персоналот ја напуштил земјата за време на затворањето на амбасадата.