Тебас: Барселона не може да го регистрира Меси, но има време
Претседателот на шпанската Ла Лига, Хавиер Тебас процени дека Барселона во овој момент финансиски не е во можност да го врати Лионел Меси, меѓутоа изрази надеж дека ситуацијата може да се промени.
Во последно време се почесто се пишува за можно враќање на Меси во Барселона, меѓутоа последната изјава на Тебас не е оптимистична за навивачите на каталонскиот гигант.
„Барселона во овој момент не би можела да го регистрира Меси, но има уште време“.
Сепак, првиот човек на Ла Лига не ја исклучува и можноста нешто да се промени.
„Нема да ги менуваме финансиските правила кои клубовите ги одобрија за Барселона да го регистрира, дури и ако наша желба е тој повторно да заигра во шпанскиот фудбал“, додаде Тебас.
Меси ја напушти Барселона летото 2021 година и премина во ПСЖ каде што на 69 натпревари постигна 31 гол, но не успеа да стане идол на навивачите како во Каталонија.