Поради настапот во квалификациите на Лигата на шампионите, Силекс својот втор натпревар во домашниот шампионат го одигра денеска против Пелистер. Клубот од Кратово ремизираше против битолската екипа со резултат 2:2, прв поведе гостинот со погодокот на Фазлиу уште во шестата минута.

Непосредно пред паузата домаќините успеаја да израмнат благодарение на Мустафов, негов прв погодок сезонава. Во 53 минута Силекс дојде и до предност преку Ивановски, а во 76 минута бод за Пелистер донесе Танушев со прекрасен гол од слободен удар.

На тој начин и по две одиграни кола овие тима остануваат непоразени во Првата лига и моментно се на делба на првото место во генералниот пласман со по четири бодови.

Останатите мечеви (17.00 часот) од рундата ќе се одиграат викендов, во сабота Работнички-Беласица, а в недела Шкендија-Струга Трим Лум, Борец-Ренова, Академија Пандев-Вардар и Шкупи-Македонија ЃП.

Да додадеме уште дека Силекс својот меч во првото квалификациско коло од ЛШ ќе го има на 18 август на гостински терен во Азербејџан против Карабах.