Свети Николе за Свети Никола доби нов Противпожарен дом со американски грант од половина милион долари
Во Свети Николе денеска во присуство на амбасадорката на САД, Анѓела Агелер, официјално е пуштен во употреба новиот Противпожарен дом, чија изградба е целосна донација од амбасадата на САД.
Амбасадорката Агелер потенцира дека граѓаните на Северна Македонија можат да сметаат на САД за поддршка и пријателство денес и во иднина. Се осврна на настаните од пред две години кога, како што рече, беснееја пожарите низ нашата држава, а народот на САД, рече, сочуствуваше со тагата и шокот на граѓаните на нашата држава.
-Како партнери одлучивме да им помогнеме на службите за Прва помош и итни интервенции на Сверна Македонија да се справат со тоа. Членовите на Противпожарната бригада си веруваат и потпираат еден на друг, обезбедувајќи безбедност и ефикасност, додека се справуваат со заканите од огнените јазици, и во истиот дух на соработка, оваа станица служи како потсетник на трајното партнерство помеѓу САД и Северна Македонија, рече Агелер.
Градоначалникот на Општина Свети Николе, Дејан Владев истакна дека новиот објект на Противпожарната единица е целосно изграден од страна на Амбасадата на САД и Инжињериската команда на морнаричките сили на САД. Грантот изнесува над 450.000 долари, а Противпожарниот дом во Свети Николе е изграден по најновите светски стандарди.
-Нашите пожарникари претходно функционираа во една застарена зграда, која не беше реновирана од далечните 60 години од претходниот век и не само што не беше соодветна за стандардите на една модерна противпожарна заштита, туку и беше ризична да се претстојува во неа, вели Владев.
Забележа дека новата Противпожарна станица ги има сите услови за непречена работа на пожарникарите и најави дека на 23 декември ќе пристигне и ново противпожарно возило обезбедено од Вардарскиот плански регион, со што ќе се комплетира возниот парк. Владев најави и дека во новиот буџет за 2023 година година предвидени се средства и за обезбедување на ново теренско возило за пожарникарите, со цел, како,што рече, да не се молат по другите институции.
Владев денеска на Амбасадорката на САД, Агелер и го врачи и највисокото признание на Општина Свети Николе, по повод патрониот празник Свети Никола.
Инаку, пожарникарите од ТППЕ-Свети Николе, освен што ги гаснат пожарите во нивната општината, тие се надлежни и за Општина Лозово, а исто така и секојдневно интервенираат и на сообраќајни несреќи на автопатот Штип-Миладиновци, како и на експресниот пат Штип-Велес, кои поминуваат низ нивна територија