Еден од основачите на музичката група „Битлси“, Пол Макартни изјави дека се послужил со вештачка интелигенција за да ја „создаде“ последната песна на легендарната четворка – Макартни, Џон Ленон, Џорџ Харисон и Ринго Стар, пишува „Би-би-си“.

За време на гостувањето во емисијата „Today“, Макартни објасни дека технологијата била искористена за да се „извлече“ гласот на Џон Ленон од едно старо демо, со цел да се заврши песната.

„Само што ја завршивме и песната ќе биде објавена оваа година“, рече Макартни, кој не ја именуваше песната, но најверојатно станува збор за композицијата на Ленон од 1978 година – „Now And Then“.

“When we came to make what will be the last Beatles record… We were able to get John’s voice through AI.”

Ahead of his exhibition at @NPGLondon of Beatles photos, Sir Paul McCartney spoke to @Marthakearney and revealed that a new record will be released this year.#R4Today

— BBC Radio 4 Today (@BBCr4today) June 13, 2023

Оваа песна веќе беше сметана за можна „песна за повторно обединување“ за „Битлси“ во 1995 година, додека тие го составуваа нивниот компилациски албум „Antohology 1“.

Макартни го добил демото една година претходно, од вдовицата на Ленон – Јоко Оно. Тоа била една од неколкуте песни на касета означена со „За Пол“, што Ленон ги направил непосредно пред неговата смрт во 1980 година.

Во изминатите години, Макартни постојано зборуваше за неговата голема желба да ја заврши оваа песна.