Словачкиот производител на батерии Ино Бат објави дека потпишал меморандум за разбирање со Владата на Србија за изградба на фабрика за батерии за електрични возила со вкупен капацитет од 32 гигавати, објави словачката агенција ТАСР, повикувајќи се на Ројтерс.

Еден од инвеститорите во Ино Бат е рударската групација Рио Тинто, според Ројтерс.

„Со нашата инвестиција во Ино Бат, се надеваме дека ќе придонесеме за одредено количество батерии да се произведуваат во Србија“, рече Марни Финлејсон, директор на секторот за производство на материјали за батерии во Рио Тинто.

Фабриката, како што се наведува, треба да биде отворена во 2025 година со почетен капацитет од четири гигавати. Владата на Србија го одобри обезбеденото финансирање до 419 милиони евра, вклучувајќи грантови и даночни кредити, за поддршка на проектот, објави ИноБат.

Иако договорот се уште не е конечен, извор запознаен со работата изјави дека е блиску до реализација. Ино Бат веќе најави дека сака да изгради една фабрика во Западна и една во Источна Европа. Минатиот месец словачката компанија потпиша и меморандум за разбирање со шпанската влада за изградба на фабрика за батерии за електрични автомобили во шпанскиот град Ваљадолид, пренесува Бизлајф.