Магдалена Митевска е сопственик на првото пилатес-студио во нашата земја и медицинска сестра по професија веќе 20 години. Носи со себе емотивна приказна, која ја води кон сѐ поголеми успеси кога станува збор за пилатесот, бидејќи основачот на пилатес-техниката е токму нејзината сестра Ирина Пилатес Митевска, која, за жал, повеќе не е со нас, па поради таа причина наследувањето на студијата се „живот“ кој го продолжува преку нив.

Магдалена ни долови како изгледа едно нејзино секојдневие:

„Денот го започнувам рано, во 6.00 часот наутро за веќе во 7.30 да бидам длабоко навлезена во сообраќајниот метеж по скопските улици, носејќи ја мојата ќеркичка Каја на училиште. И покрај тоа што денот ми почнува рано, мене секогаш ми фалат 15 минути, па така сите што добро ме познаваат, исто толку добро и ме толерираат.

Првиот дел од денот го поминувам како одговорна медицинска сестра на одделот за интензивна нега каде што посветено и со љубов работам 20 години. Во вториот дел од денот се препуштам на обврските кон пилатес-студијата и нивно организирање, каде што имам голема помош од инструкторите.

Попладнето најчесто го поминувам во некое од трите студија каде што ја следам љубовта на нашите клиенти кон здравото живеење.

Ноќта е мојот „ден“, кога можам да се посветам на себеси по завршувањето на обврските, така што уживам во топла атмосфера и добар филм.

Во овој период главна преокупација ми беше организацијата на 20-тиот роденден и јубилеј на нашето пилатес-студио.

Дружбата, насмевките и ведриот дух на нашите згодни клиенти од салата ја пренасочивме во добра забава во еден од познатите скопски клубови.

Сите заедно го прославивме длабокото полнолетство на нешто преку коешто сѐ уште живее мојата сестра Ирина.

Во пресрет на новогодишните празници ќе посакам добро здравје, среќа и успех за себе и за моите блиски и уште многу успешни години постоење.“