Рускиот министер за одбрана Сергеј Шојгу го посети Мариупол, град во источниот украински регион, кој беше окупиран од Москва, со цел лично да се увери во работите за обнова на регионот Донбас, соопшти руската армија.

Министерот Шојгу ги прегледа веќе реновираните згради и ги посети новите градилишта во Мариупол, соопшти армијата за обиколката на „зоната за специјална воена операција“, име кое Москва редовно го користи за војната во Украина.

Шојгу го посети медицинскиот центар и новата станбена област и му беше претставен планот за обнова на училиштата во Мариупол, пристанишен град што руските војници го зазедоа во мај по повеќемесечна опсада.

Според истиот извор, на министерот му бил презентиран и извештај за реставрација на голем аквадукт што ќе ја поврзе Народна Република Доњецк во источна Украина со руската Ростовска област.

Шојгу во саботата ја посети „командата“ каде се води крвавата битка за Бахмут, а на крајот на декември двапати ги посети зоните на „специјалните воени операции“ во Украина, јавуваат руските медиуми.