„Шарла рекордс“ објави музичко издание со жанровска и стилска шареноликост
Независниот музички издавач „Шарла рекордс“ неодамна го издаде своето 73-то издание со наслов „Циркусот никогаш не запира“ (Circus Never Ends – Sharla Records Label Sampler 21/22).
Станува збор за веќе традиционална, годишна компилација составена од музика на бендови и артисти што издаваат за „Шарла рекордс“. Осум од нив влегоа во овогодишниот избор, меѓу кои има и четири нови и досега необјавени нумери што треба да се најдат на следни изданија.
Жанровската и стилска шареноликост, која е карактеристична за овој издавач, е пресликана и во новото издание, особено наменето за слушатели со широк музички интерес и потреби.
Компилацијата ја состави Давид Ангелевски, кој го потпиша и омотот, направен врз фотографии на Ивица Јанкуловски. Компилацијата може да се преслуша и преземе од бендкемп-профилот на „Шарла рекордс“.
(Текстот е објавен во „Културен печат“ број 121, во печатеното издание на весникот „Слободен печат“ на 19-20 март 2022)