Состојбата во градинките е стабилна, а во последната недела се забележува помал број на оние што одат во изолација и зголемување на бројот на деца што се вратиле во градинките, рече  министерката за труд и социјална политика Јагода Шахпаска, при денешното пуштање во употреба на нова градинка во населеното место Миладиновци.

– Состојбата во градинките е стабилна. На дневно ниво ги следиме податоците што доаѓаат кај нас во Министерството. Се потврдува трендот што го најавив минатите прес-конференции. Кај бројот на новозаразени како на вработени, така и на деца има тренд на намалување. Трета седмица имаме намалување на бројот на оние што одат во изолација – изјави Шахпаска.

Таа, додаде, дека бројот на оние кои одат во изолација е помал од оние што се враќаат и дека се  зголемил бројот на децата што се вратиле во градинките за околу 500.

– Тоа покажува дека во градинките доследно се почитуваат протоколите од вработените, дека нема ширење на пандемијата внатре меѓу вработени и децата и  вирусот доаѓа однадвор – рече Шахпаска.