Се полни гласачкото ливче – седуммина кандидати во трката за „Вила Водно“
Стево Пендаровски и Гордана Силјановска-Давкова викендов ја добија поддршката од матичните партии и ги собраа неопходните 10 илјади потписи со што им се придружија на Бујар Османи(ДУИ), Арбен Таравари (ВРЕДИ), Максим Димитриевски (ЗНАМ), Биљана Ванковска (Левица) и Стевчо Јакимовски (ГРОМ) во трката за „Вила Водно“.
Останатите кандидати во трката за претседател се далеку од 10.000 потпишани, што е неопходно за учество на претседателските избори.
Според последниот пресек на Државната изборна комисија (ДИК) до вчера во 20 часот, Мерсиха Смаиловиќ – поддржана од Бошњачкиот демократски сојуз, има 1.411 потписи, Вело Марковски како независен кандидат има 1.402 , за Господин Попоски од Вевчани се потпишале 109 граѓани, за Зорица Цветковска од Десна – 195, независниот кандидат Ѓoрѓи Манасков – 414 граѓани, додека кај Томе Николоски кој се откажа од трката стои бројката на нула потписи. И Ѓорѓи Манасков вчера укажа на нерегуларности и побара да се стопира целата постапка за собирање потписи.
Рокот за собирање на потписи истекува на 8 март, на полноќ.