Русија ја зајакнува одбраната на својата поморска база на Црноморската флота во Новоросијск, соопшти британското Министерство за одбрана.

„Инфраструктурата за одржување, логистика и ракување со оружје во Новоросијск е многу веројатно подобрена“, напиша Министерството во објава на мрежата „X“, повикувајќи се на сателитска фотографија со која располага, пренесува „Business Insider“.

Министерството за одбрана на Обединетото Кралство во своето ажурирање забележа дека Црноморската флота „во голема мера ги повлече своите бродови и подморници од Севастопол кон исток до Новоросијск“.

Русија ги повлече бродовите за да се обиде да го заштити она што остана од нејзината оштетена Црноморска флота, се вели во соопштението на британското Министерство за одбрана

Базирањето на флотата во Новоросијск, рече министерството, е „најдобриот метод на флотата за избегнување на украински напади преку море“.

Руските поморски сили претрпеа значителни загуби од почетокот на војната во Украина во февруари 2022 година.

Во февруари, шефот на вооружените сили на Обединетото Кралство, адмирал сер Тони Радакин процени дека 25% од руските бродови во Црното Море биле потонати или оштетени.

Успехот на Украина во поморската војна, исто така, резултираше со замена на поранешниот командант на Црноморската флота, адмирал Виктор Соколов, со вицеадмирал Сергеј Пинчук.

„Флотата е најмалку активна од почетокот на војната“, соопшти британското Министерство за одбрана.

Фокусот на Црното Море, и од Русите и од Украинците, ја нагласува важноста на поморската трговска рута.

За Украина, пристапот до Црното Море е клучен за извоз на жито и прехранбени производи во земјата.

Ова не е прв пат Русите да се обидат да ја зајакнат својата поморска одбрана за да ги спречат идните украински напади.

Минатиот месец, британското Министерство за одбрана соопшти дека „идентификувало четири бродови позиционирани на влезот во морското пристаниште Новоросијск.