Регулаторната комисија за енергетика подготвува предлог-измени во Законот за енергетика, со кои ќе побара поголеми ингеренции и прецизирање на надлежноста во за изрекување повисоки казни кон операторите на дистрибутивните системи, доколку поради нивна неажурност и лоша организација ги оставиле потрошувачите без греење во време на грејна сезона.

– Мора да ги зголемиме нашите ингеренции и да можеме да изрекуваме сериозни казни кои ќе бидат врзани со  процент од вкупен приход што го остваруваат енергетските компании, што е и сугестија од Енергетската заедница. Сега, овие казни се многу мали и незначајни за нив и се од 5 до 7.000 евра во зависност од делото. Со зголемување на казните, ќе делуваме превентивно и ќе се дисциплинираат операторите на дистрибутивните системи да не се чувствуваат комотно и сериозно да ја сфатат својата улога, а со тоа ќе ги заштитиме потрошувачите. Дополнително, измените ќе бидат и во насока веднаш да може да добијат пониски сметки, доколку не ја добијат услугата, а не како сега на крај од грејната сезона во порамнителните сметки –  изјави Марко Бислимоски, претседател на РКЕ.