Четврта година по ред, шпанскиот гигант Реал Мадрид е на врвот на листата на највредни фудбалски клубови во светот, со проценета вредност од 6,75 милијарди долари, што е за два проценти повеќе од минатата година, објави во саботата бизнис магазинот „Форбс“.

Реал Мадрид стана првиот фудбалски клуб што заработил 1 милијарда долари за една година, откако оствари рекордни 1,13 милијарди долари приходи во сезоната 2023/24, додаде Форбс.

Англискиот Манчестер јунајтед е втор на листата на Форбс со проценка од 6,6 милијарди долари, откако оствари приход од 834 милиони долари во сезоната 2023/24.

Ривалите на Реал од Ла Лига, Барселона, се на третото место, проценети на 5,65 милијарди долари, додека Ливерпул и Манчестер сити се на четвртото и петтото место. Шести е Баерн Минхен, а потоа следува ПСЖ.

„Форбс“ именуваше шест тима од Премиер лигата меѓу 10 највредни тимови, а по ПСЖ следуваат Арсенал, Тотенхем и Челси.

– Заедно, 30-те највредни фудбалски клубови вредат повеќе од 72 милијарди долари, или просечно 2,4 милијарди долари, што е за пет проценти повеќе од рекордните 2,26 милијарди долари во 2024 година – стои во објавата на Форбс.