Рускиот претседател Владимир Путин пристигна во посета на Киргистан, објавија новинските агенции на двете земји, што е прво познато патување на рускиот лидер во странство откако Меѓународниот кривичен суд (МКС) издаде налог за негово апсење.

Путин ретко ја напушта Русија од почетокот на инвазијата на Украина во февруари 2022 година и не се знае дека патувал надвор од земјата откако Судот во Хаг издаде налог за апсење во март под сомнение дека незаконски депортирал стотици деца од Украина. Кремљ ги негира ваквите обвинувања.

Рускиот претседател во текот на денот треба да разговара со својот киргистански колега Садир Јапаров и да учествува на самитот на лидерите на Комонвелтот на независни држави, кој обединува неколку поранешни советски републики, во петок.

„На покана на киргистанскиот претседател Садир Јапаров, на 12 октомври во официјална посета на земјата ќе дојде претседателот на Руската Федерација, Владимир Путин“, објави претходно на својата веб-страница киргистанската претседателска администрација.

Во мај, за време на разговорите со Јапаров, Путин ја прифати поканата да го посети Киргистан.

Рускиот лидер следната недела треба да отпатува во Кина на третиот форум на Иницијативата „Појас и пат“ во Пекинг. Ниту Киргистан ниту Кина не се членки на МКС.

Москва ги негира обвиненијата на МКС, а Кремљ рече дека налогот е доказ за непријателството на Западот кон Русија, што поттикна кривична постапка против обвинителите на МКС и судиите кои го издадоа налогот.