Протест на КСС: Законот за администрација нема ништо европско, само поттикнува непотизам и примитивизам
Конфедерацијата на слободни синдикати (КСС) денеска пред законодавниот дом го изрази своето незадоволство поради носењето на Предлог-Законот за административни службеници, кој е влезен во собраниска процедура во скратена постапка. Со Предлог-законот за административни службеници, претседателот на КСС Благоја Ралповски вели се изземаат круцијалната права на работникот, вадење на минималната плата, како и непочитување на Законот за минимална плата.
-Овој закон нема ништо европско, со овој закон само се поттикнува непотизмот и примитивизмот. Вадењето на минималната плата да важи од март, а сите други одредби од 01.01.2025 година, мислиме дека не е време да се носи еден ваков закон, како што го кажуваат реформски и европски, а нема ништо европско, ниту реформско, рече Ралповски.
Посочи дека поголемиот дел од работниците во јавниот сектор ќе продолжат да земаат минимална плата и нема да добијат усогласување на платите во март, и како што рече, не може да има државни службеници кои што земаат минимална плата, а да се бара професионалност од администрацијата.
-Оној закон што е закачен на ЕНЕР беше дозволен за јавна дебата, но овој закон не беше ставен на ЕНЕР, ние првпат го видовме во собраниска процедура. Овој закон е поставен шверцерски, без јавна дебата и не знам зошто пратениците од мнозинството се обидоа да не отфрлат нас како синдикати кои што баравме јавна дебата. Не знам која е потребата, ние кажавме уште при потпишувањето на општиот колективен договор дека имаме камен на сопнување, но и тогаш кажавме, а ќе кажеме и сега дека ќе си ги браниме нашите права онака како што ги браневме многу години наназад, низ протести и штрајкови, рече Ралповски.
Ветувањето при потпишувањето на општиот колективен договор од страна на министерот за финансии Фатмир Бесими и министерката за труд и социјална политика Јована Тренчевска, дека ќе се допреговара овој дел од Законот, Ралповски рече не е исполнето.
-Очигледно си најдоа партнер со којшто сакаат да си го потпишат општиот колективен договор и овој дел што беше ветен од министерот Бесими и министерката Јована Тренчевска, не беше исполнет, така да се потпиша без да се реши овој проблем, додаде Ралповски.
Алиу: Не брзаме со законот за администрација, на него се работи седум години
Министерот за информатичко општество и администрација Азир Алиу вчера изјави дека владејачкото мнозинство не се брза пред избори да го донесе Предлог-законот за административни службеници, по скратена постапка, бидејќи на него се работи веќе седум години, а за тврдењата на синдикатите за минималната плата, посочува на новата методологија за усогласување на платите што ќе се применува од 1 март 2025 година.
– Со овој закон и со пакетот закони воопшто не се брза, рече Алиу, додавајќи дека на законот се работи од 2017 година. Работните групи седум години работеле на овој закон, а само на ЕНЕР имало три верзии на законот и имало безброј дебати и работилници, дел поддржани од меѓународните институции.
Пратеникот од ВМРО-ДПМНЕ, Бојан Стојановски најави дека ќе поднесат 21 амандман на овој предлог закон. За другите закони кои се дел од пакетот закони поднесени од Министерството за информатичко општество и администрација, од пратеничката група на ВМРО-ДПМНЕ најавуваат дека ќе поднесат уште 16-тина амандмани, но не ја исклучуваат можноста амандмани да се интервенира и на самата Комисија.
ВМРО-ДПМНЕ најави дека ќе поднесе 21 амандман на Предлог-законот за административни службеници
Ако предложениот закон за административни службеници помине по брза постапка со европско знаменце на собраниска седница, од Сојузот на синдикатите на Македонија (ССМ) и Синдикатот на работниците од управата,правосудните органи и здруженија на граѓани на Република Македонија (УПОЗ) изразуваат загриженост дека се нарушуваат работничките права и интереси, без почитување на стандардната процедура за донесување на закони со активно учество на заинтересираните страни, по пат на јавна расправа и социјален дијалог преку Економско социјалниот совет.
Тие остануваат на барањето да има широка дебата за законот и да бидат вклучени во неа.