Просинечки: Првпат слушам такво нешто, со никого не сум разговарал од ФФМ!
Веста која вчера ја објави српскиот „Курир“ предизвика големо внимание во македонската фудбалска јавност околу селекторската клупа на сениорите.
Излезе информација дека прославениот хрватски фудбалер Роберт Просинечки би можел да ја води нашата А репрезентација на наредното Европско првенство, но од тоа нема никаква вистина.
Повторно ќе информираме дека Игор Ангеловски кој успеа да ја однесе Македонија на ЕП има договор до 31.12.2020, и како што известија од ФФМ после завршувањето на истиот ќе се разговара за евентуално продолжување на соработката.
Просинечки кој ја напушти клупата на турскиот клуб Денизлиспор е моментно без функција и веднаш таквиот факт бил искористен за објавување на вест која на крајот испадна дека не е точна.
Хрватскиот веб портал „Јутарњи“ веднаш го прашаа за ваквите гласини и еве го неговиот одговор:
– Вие сте првиот што ми го кажува тоа..не ги читав порталите. Навистина не знам ништо за тоа, еве, ти велам, прв пат слушам такво нешто. Јас воопшто не сум разговарал со никого од Фудбалската федерација на Македонија. Јас сум дома во Загреб откако се вратив од Турција, нема други новости – рече Просинечки.