Екипата на новото остварување на „Марвел“, „The Eternals“ итно е евакуирана од сетот откако е пронајдена недетонирана бомба на местото каде што е снимана сцената.

Ѕвездите на филмот, Анџелина Џоли и Ричард Маден, откако била пронајдена бомбата веднаш биле преместени на безбедно место. Местото на случувањето е Фуертевентура на Канарските Острови.

Како што пренесуваат странските медиуми, сите биле во паника, а веднаш стигнала екипа од професионалци кои ја отстраниле бомбата.

„Беше страшно. Бомбата стоела таму со децении недопрена, а којзнае што сè можеше да се случи, можеше да се активира“, рекол извор за „The Sun“.

Сè уште не се знае од каде е бомбата или колку долго стоела таму, но се знае дека островот го користеле Германците како своја база во текот на Втората светска војна.

Во актерската екипа се наоѓаат и Селма Хаек и Кит Харингтон, за кои не е познато дали тогаш се наоѓале на снимањето.