Новата книга со наслов „Приватна насмевка“ од Гоце Дртковски ќе биде промовирана на 9-ти октомври во „Јавна соба“, со почеток во 20 часот. Во книгата се поместени тринаесет раскази и четири есеи за слободата. Издавач на книгата е „Љубовта е петтиот елемент“ од Скопје.

Авторот Гоце Дртковски првпат се јавува со наслов од областа на литературата. На промоцијата, актерот Филип Трајковиќ ќе прочита делови од книгата и во пријатниот простор во поткровјето на „Јавна соба“ ќе се слушаат незаборавни македонски забавни мелодии.

Гоце Дртковски е новинар, колумнист, публицист, издавач и автор е на повеќе книги: „Затворено општество“ ‒ за слободата на говорот во првите години од осамостојувањето на земјата. Во „Слободен новинар“ Дртковски пишува за своето искуство во новинарството.

Најзначајно негово дело е книгата „Вонредна состојба“, каде што се истражува периодот на посткомунизмот во Македонија. „Непријатност во Културата, или Културата и другите демони“ е негова книга есеи, објавена во 2022 година.

Во претставувањето на книгата „Приватна насмевка“ се вели: „Да се биде како другите, значи да се биде нормалeн, и тоа е крајната цел на граѓанскиот конформизам. Ние лесно се приспособуваме на мејнстримот, таму препознаваме желби и ги откриваме правилата кои треба да се следат. И во уметноста и во книжевноста, главниот тек лесно може да ве заведе. Ликовите во ‘Приватна насмевка’ се држат понастрана од мејнстримот, од клишето, и за нив не важи емотивниот маниризам кој доминира во глобалната инстант-култура.

Книжевната нарација е скептична кон животот и постојано прашува: зошто? Таму нема јадосувања, чемер, мачнина – во ‘Приватна насмевка’ се вгнездил заборавот и без сочувство и емотивни патоси, без лифтинзи и фотошопирања, со неподнослива леснотија се зборува за животот. На прашањето дали така мораше да биде, некој глас таму спокојно вели: Да, така мораше да биде.“