Глобалните потрошувачи најмногу ги ценат производите од Германија, а во голема мерка недоверба имаат во кинеските производи, според истражувањето на компанијата за јавно мислење „YouGov“ и Универзитетот Кембриџ.

Повеќе од половина од испитаниците во 23 земји дадоа позитивна оценка за германските производи, а само шест проценти им дадоа негативен рејтинг, покажуваат резултатите од истражувањето направено преку Интернет.

Притоа, Германија постигна 45 поени во истражувањето. Италија заврши на второто место со 38 поени, а потоа следуваат Велика Британија и Франција, и двете земји со по 34 поени. Јапонија постигна 33 поени и за пет бода е подобра од Јужна Кореја.

За кинеските производи во просек 44 проценти од испитаниците ги оценуваат негативно, а пак 15 проценти од нив како позитивни. Кина со тоа се најде на последното место, 12. место во групата на земјите-производители, со освоени нето 29 бодови.

Анкетирани беа потрошувачите од земји и региони со високи приходи, вклучително и Европската унија, САД, Австралија и Јапонија, но и потрошувачи со ниски приходи како Индија, Мексико, Кина, Нигерија и Јужна Африка.

– Нашето истражување покажува дека потеклото на производот продолжува значително да ја обликува својата перцепција кај потрошувачите – заклучи директорот за маркетинг на „YouGov Germany“, Филип Шнајдер.