Професорката Биљана Ангелова од Економскиот институт е нов ректор на УКИМ
Професор-доктор Биљана Ангелова од Економскиот институт е нов ректор на УКИМ, потврди таа за повеќе медиуми. Неофицијално, таа на денешните избори за прв човек на нашиот најстар и најголем универзитет, убедливо ги победила останатите петмина кандидати.
Официјално, универзитетот сѐ уште не ги објавил резултатите од денешното гласање.
Редовни, вонредни професори, доценти и студенти – членови на универзитетски студентски собранија на Универзитетот „Св. Кирил и Методиј“ денеска избираа прв човек на најстарата високообразовна институција во државата.
Во трка за мандатниот период од 16 септември 2023 до 15 септември 2026 година, беа деканот на Филозофски факултет проф. д-р Ратко Дуев, потоа, проф. д-р Горан Ајдински, исто така од Филозофскиот факултет, проф. д-р Христина Спасевска од Факултетот за електротехника и информациски технологии (ФЕИТ) и актуелна проректорка за настава, проф. д-р Димитар Ташковски исто така од ФЕИТ, проф. д-р Атанас Кочов од Машинскиот факултет, како и актуелната проректорка за финансии, проф. д-р Биљана Ангелова.
Ангелова од 1992 година е вработена во Економскиот институт, каде во континуитет напредува во сите научни и наставно-научни звања. Во 2007 година првпат е избрана во највисокото научно звање научен советник/редовен професор во областа на деловните финансии, а во 2012 година повторно е избрана за редовен професор во областа на финансискиот менаџмент.
Во периодот 2006-2008 година била раководител на втор циклус студии по Меѓународен менаџмент, а од 2008 година до денес раководи со насоката Финансиски менаџмент. Била прв раководител на студиите од трет циклус по организациски науки – менаџмент на Универзитетот „Св. Кирил и Методиј“ во Скопје во периодот 2012-2016 година. Од ноември 2009 г. до септември 2016 година била директор на Економскиот институт.
Во јуни 2016 г. е избрана за проректор за финансии, инвестиции и развој на Универзитетот „Св. Кирил и Методиј“ во Скопје, на која функција е и вторпат избрана и во 2020 година за мандатниот период 2020-2023 година. Од 2016 до 2023 година е претседател на Комисијата за финансии на Универзитетот „Св. Кирил и Методиј“ во Скопје и на Комисијата за издавачка дејност на Универзитетот.