Универзитетот „Кирил и Методиј“ официјално ги соопшти резултатите од денешните избори за ректор, на кои 1.419 редовни и вонредни професори, доценти и студенти гласаа за избор на нов ректор за мандатниот период од 16 септември 2023 – 15 септември 2026 година.

„Актуелната проректорка за финансии на универзитетот, Биљана Ангелова, стана нов ректор со добиени само 27% од вкупниот број на гласови според Единствениот избирачки список, односно 392 гласа. Разликата помеѓу гласовите на професорите Христина Спасевска и Димитар Ташковски, кои доаѓаат од ФЕИТ, е само 5 гласа. Вкупно 187 професори и студенти гласале за професорката Спасевска, додека пак 192 гласа за Ташковски. Горан Ајдински од Филозофскиот факултет на денешните избори за ректор освои 181 глас од вкупно 1 419 гласачи, 152 гласови за професорот Атанас Кочов и 118 за професорот Дуев“, се вели во соопштението од УКИМ.

Гласањето за избор на ректор се одржа на 23 факултети и пет институти во состав на УКИМ. Од вкупно 1.419 гласачи запишани во Единствениот избирачки список на УКИМ, правото на глас го искористил 1.251 гласач (88,16 %), а 29 гласови се неважечки, соопштија од УКИМ.

Професорката од Економскиот институт Ангелова ќе биде втората жена-ректор на УКИМ во 74-годишната историја на нашиот најголем и најстар универзитет. Од 1996 до 1998 година, на највисоката позиција на УКИМ беше проф.-д-р Радмила Кипријанова.

Професорката Биљана Ангелова од Економскиот институт е нов ректор на УКИМ