Приведени двајца кумановци поради шверц на Сиријци, возачот скршил наплатна рампа и избегал
Полициски службеници од Полициската станица за граничен премин и граничен надзор Богородица вчера околу 05.30 часот ги привела четириесет и седумгодишниот Р.М. и пеесет и едногодишниот П.Ј. , двајцата од Куманово, осомничени дека со возило „опел астра“ со кумановски регистарски ознаки биле претходница на патничко возило „рено меган“ со кумановски регистарски ознаки, во кое околу 01.30 часот биле пронајдени мигранти
– Имено, околу 01.30 часот од страна на полициски службеници од Полициската станица за граничен премин и граничен надзор Богородица на автопатот А1 бил даден знак за запирање на возилото „рено меган“, но возилото продолжило со движење, скршило рампа на наплатата станица Смоквица, по што излетало од патот, а возачот го напуштил местото, информираа денеска од МВР.
Притоа, појаснуваат од МВР, во возилото биле пронајдени шест лица мигранти од Сирија. По целосно расчистување и документирање на случајот ќе биде поднесена соодветна пријава.