Пратениците си го продолжија одморот за уште најмалку 10 дена откако во минатата недела за само неколку часа заврши расправата за отворање на Уставот, а претседателот на Собранието Талат Џафери го одложи гласањето откако по усвојувањето на дневниот ред на седницата беше јасно дека власта нема двотретинско мнозинство за уставните измени.

Според собраниски извори, првата наредна пленарна седница се очекува да биде на 5 септември. Дека пратениците се на продолжен одмор потврда е и тоа што денеска не се оддржала редовната координација на Џафери со шефовите на пратеничките групи.

И на официјалната страница на Собранието до крајот на месецов нема закажани активности на пратениците, односно нема комисиски расправи, ниту е закажана пленарна седница. Извесно е и дека во август ќе нема ниту пратенички прашања, кои вообичаено се оддржуваат секој последен четврток во месецот.