Претседател на Канарските Острови, Фернандо Клавихо денеска изјави дека полицијата потврдила дека пожарот што беснее на шпанскиот туристички остров Тенерифе бил намерно предизвикан. Тој изјави дека полицијата отворила три истраги, но не прецизираше дали имало апсења.

Подобрените временски услови им помогнаа на пожарникарите да напредуваат во текот на ноќта со пожарот, кој беснее во последните пет дена, соопштија властите.

„Ноќта беше многу тешка, но благодарение на работата на пожарникарите, резултатите беа многу позитивни“, изјави гувернерката на Тенерифе Роза Давила на прес-конференција.

На Канарските Острови има подпросечни врнежи во последниве години поради променливите временски модели под влијание на климатските промени. Иако пожарот на северо-источниот дел на островот не е блиску до главните туристички области на југозапад, регионалната влада нареди евакуација на државниот хотел во Националниот парк вулкан Теиде, во централниот дел на Тенерифе. на околу 50 километри југозападно од пожарната зона.

Давила рече дека повеќе од 12.000 луѓе се евакуирани од своите домови по избувнувањето на пожарот во вторникот.

Службите за итни случаи на островот денеска соопштија дека изгореле 11.600 хектари борова шума и грмушки. Засега нема информации за повредени, а Давила истакна дека благодарение на пожарникарите досега не изгорела ниту една куќа.

Пожарникарите на Тенерифе успеале да ги спасат куќите од пожарот што се приближува