Претседателот на ВМРО-ДПМНЕ порача дека е потребно национално обединување и повика да запрат сите напади кон политичките партии „ЗНАМ“ и „Левица“. Според Христијан Мицкоски, иако тие како партии имаат многу различности и во идеолошка и во принципиелна смисла, сепак почувствувал „потреба на македонскиот народ но, и неговаа обврска да се обиде да ја реализира идејата за национално единство во моменти кога тоа и е најпотребно на Македонија“.

Мицкоски посочи дека долго време таа обврска и одговорност како да се одбегнувала, а понекогаш и се занемарувала и никогаш како сега не било важно како сега да се случи обединување, да се обезбеди национално единство.

„Мојата прва иницијатива за обезбедување на македонско национално единство ќе ја започнам со тоа што сакам да обзнанам мораториум во нападите кон партиите Левица и ЗНАМ. Ова го чувствувам како потреба на македонскиот народ но, и како моја обврска да се обидам да ја реализирам идејата за национално единство во моменти кога таа и е најпотребна на Македонија“, рече Мицкоски.

Додаде дека со Левица и ЗНАМ, ВМРО-ДПМНЕ има свои разлики по повеќе прашања и од идеолошка но и од принципиелна природа, но смета дека во моментов, најважно за Македонија е да се фокусираат на оние кои што ја киднапираа државата од граѓаните.

„Но, ценам дека во моментов најклучно за иднината на земјата е да се фокусираме на оние кои ја киднапираа Македонија од рацете на граѓаните. Разидувањата сигурно ќе продолжат, но мора да наоѓаме заеднички јазик без разлика на лични и партиски суети и интереси. Од нив не очекувам да го направат истото. Дури можеби и ќе ме нападнат за овој гест, можеби некои оправдано ќе кажат дека задоцнет, но и покрај тоа, како и да се однесуваат споменатите партии, ние како партија ќе опстоиме на нашиот збор“, порача Мицкоски.