Поразот од Јунајтед ќе му пресуди на Тухел?!
Поразот од Манчестер јунајтед на стартот од Лигата на шампионите повторно ги возбуди страстите и одново во преден план ги исфрли проблемите на релација тренер – директор, односно Томас Тухел и Леонардо.
Според новинарот Пјер Менес, Тухел нема каде да се сокрие по поразот и одново му се тресе тренерското столче.
– ПСЖ ужасно игра, срамно е на што личеа во првото полувреме. Дури кога Рафиња влезе во игра, малку се променија работите, но поразот е сосема заслужен. Тухел ги загуби конците, погледнете како изгледа екипата. Нејмар е најдобар играч на ПСЖ, но не ваков каков што беше на теренот, тврдоглав и кога никому не ја дава топката. Овој тим нема тренер – вели новинарот Менес.
Денеска и италијанските медиуми, поточно „Газета дело спорт“ се знимаваат дека Леонардо интензивно работи на реализација на неговиот план, отказ на Тухел и замена со Масимилијано Алегри. Според весникот, Леонардо веќе започнал да лобира кај сопствениците на ПСЖ, катарското кралско семејство Ал Тани, да дадат зелено светло за смена на Германецот и дека Алегри е подготвен веднаш да седне на клупата.
„Газета дело Спорт“ тврди дека последна шанса за Тухел да се спаси од отказ е натпреварот од второто коло против Башакшехир во Истанбул кој мора да го добие.