Судењата за „Ласкарци“, „Жан Митрев“ и „Титаник“ се презакажани поради Самитот на ОБСЕ што ќе се одржи во Скопје.

Основниот кривичен суд Скопје го промени терминот за главна расправа за сообраќајната несреќа кај Ласкарци, а судењето ќе продолжи на 14 декември во 9:30 часот.

Глaвната расправа за предметот поврзан со приватна здравствена установа „Жан Митрев“ насрочена за утре, исто така, се отповика, поради одлуката на Владата да се работи со скратено работно време и ќе продолжи на 15 декември во 12 часот.

Презакажано е и рочиштето за изборните нерегуларности, „Титаник“, насрочено за 30 ноември, кое ќе продолжи на 12 декември од 10 часот.

Како што информираат од Основен кривичен суд Скопје, за сите останати судења насрочени во судот за 29 ноември по 12 часот и на 30 ноември за време на целиот ден, кои ќе се одложат заради одлуката на Владата, странките ќе добијат дополнителни известувања кога ќе продолжат со расправите.