Помина сезоната која за македонскиот кошаркарски шампион МЗТ Скопје Аеродром беше „црно-бела“, односно аеродромци ја демонстрираа својата апсолутна надмоќ на домашната сцена, но, доживеаја неуспех на меѓународната сцена, во регионалната АБА лига.

„Металците“ со импресивна доминација стигнаа до титулите во Првата лига и во Купот на Македонија, но испаднаа од АБА лигата, натпреварување каде опстанокот им беше примарна цел за сезонава.

Спротивставеноста на домашните резултати на нашиот шампион во однос на оние што ги постигна во регионалната лига веројатно ја покажува разликата во квалитет на целата наша домашна клупска сцена во однос на квалитетот во регионот. На наша штета.

Надмоќно делуваше најдобриот македонски кошаркарски клуб во натпреварите во Македонија. Против македонските конкуренти сезонава МЗТ Скопје одигра вкупно 33 средби во кои оствари 31 победа, претрпе само два пораза и освои три трофеи (Суперкупот, Купот на Македонија и Првенството).  Финалната плејоф серија против Пелистер, шампионот ја доби со убедливи 3-0.

Сепак МЗТ Скопје потфрли во АБА лигата, која беше истакнувана од страна на клубот како приоритено натпреварување во сезоната 2022/2023.

МЗТ Скопје се врати во АБА лигата по четири сезони пауза, но не успеа да опстане и идната сезона ова регионално натпреварување повторно ќе нема претставник од Македонија.

До последното коло се бореа аеродромци за опстанок, но не успеаја. МЗТ Скопје заедно со Борац Чачак имаа најслаб скор во регуларниот дел од сезоната, односно забележаа по 19 порази и само по седум победи. Но македонскиот клуб заработи последно место и директна елиминација, поради послабиот меѓусебен скор со чачани.