Американскиот пејач и текстописец Џими Бафет, познат по својот хит „Margaritaville“, почина на 76-годишна возраст, објавено е во саботата на неговата веб-страница, пренесува Хина. Бафет во тајност се борел со ракот, објавија американските медиуми.

„Џими почина мирно ноќта на 1 септември опкружен со членовите на семејството, пријателите, музиката и кучињата. Животот го живееше како песна до последниот здив и на многумина ќе им недостига“, напиша семејството.

„Margaritaville“, песна објавена во 1977 година, се искачи на 8-то место на 100-те најголеми хитови на „Билборд“, каде што се задржа на топ-листата 22 недели. Тоа беше неговиот најпопуларен сингл.

Бафет може да се пофали со 27 студиски албуми, четири платинести и осум златни, во текот на кариерата долга пет децении.

Тој исто така беше кантавтор, а водеше и сопствена деловна империја.

Зад себе ги остави сопругата Џејн Слагсвол, двете ќерки Сара и Савана и синот Камерон.