Во Босна и Херцеговина во изминатото деноноќие се потврдени релативно мал број на нови случаи на коронавирус – 726, но во исто време е поставен нов црн рекорд со дури 73 смртни случаи, објавија ентитетските институти за јавно здравје.

За 24 часа се тестирани над 2.100 примероци, а инфекцијата е потврдена кај 430 лица во Федерацијата БиХ и во 296 од Република Српска.

Бројот на новозаразени е значително помал од дневниот просек во минатата недела, но бројот на тестирани примероци е, исто така, значително помал, што е вообичаена практика за време на викендите.

Во Федерацијата БиХ се регистрирани вкупно 47 смртни случаи, најголем број за еден ден во ентитетот, и 26 во Република Српска. Вкупниот број на смртни случаи во БиХ од почетокот на епидемијата во март изнесува 1.972.

Властите во БиХ сè уште не најавија воведување на построги ограничувачки мерки од оние што се веќе во сила. Во Федерацијата БиХ сè уште важи забраната за движење во текот на ноќта со исклучок на лицата кои поради работа не се дома, додека во РС нема такво ограничување.