Кинеските градови Гуангжу и Чонгкинг денеска најавија олеснување на ограничувањата за коронавирусот, еден ден по судирите меѓу демонстрантите и полицијата во Гуангжу.

Локалните власти во Чонгкинг донесоа одлука да дозволат контакт со луѓе позитивни на корона вирусот, но под одредени услови кои вклучуваат домашен карантин.

Градот Гуангжу, кој се наоѓа недалеку од Хонг Конг, исто така најави олеснување на рестриктивните мерки.

Сепак, демонстрациите во текот на викендот се проширија и во Шангај, Пекинг и други градови.

Стотици теренски возила, комбиња и оклопни возила под ротациски светла и денеска беа забележани низ улиците на кинеските градови.

Полицијата спроведуваше случајни проверки на лични документи и ги пребаруваше мобилните телефони на луѓето во потрага по фотографии, забранети апликации или други потенцијални докази за учество во демонстрациите.

Засега не е познат бројот на приведените на демонстрациите и на подоцнежните полициски акции.

Инаку Кинеските универзитети ги испраќаат студентите дома, за да ги спречи најголемите демонстрации во последните децении, во кои се бара оставка од кинескиот лидер Си Џинпинг поради строгите ограничувања за борба против коронавирусот.

Универзитетите соопштија дека наставата и завршните испити ќе се одвиваат онлајн.

„Властите се надеваат дека со чистењето на кампусот ќе ја „разблажат ситуацијата, оцени Дали Јанг, експерт за кинеска политика од Универзитетот во Чикаго.

Генералната директорка на Меѓународниот монетарен фонд (ММФ), Кристалина Георгиева, вчера во Берлин изјави дека е време Кина да престане да ја следи стратегијата за масовно затворање на населението за да го спречи ширењето на коронавирусот.

ММФ: Кина да ја преиспита политиката „нула ковид“, која има последици врз светската економија