На овие избори и на 24 април и на осми мај бројот еден е единствената гаранција дека државата ќе продолжи по патот на интеграција во ЕУ, порача од Бутел претседателскиот кандидат Стево Пендаровски.

„А шо нуди главната противкандидатка и нејзината партија? Во однос на преспанскиот договор којшто го постигнавме и влеговме во НАТО, нивната цел е кога ќе дојдат на власт, ако дојдат на власт, не дај боже да дојдат на власт да го поништат договорот и да почнат нови преговори. Кога ќе ги прашате што ви фали во тој договор зошто би го поништувале, зошто наново да почнуваме преговори тие не сакаат да ја видат клучната реченица во тој договор во кој вели има Македонци, има македонски јазик и тие се верификувани на ниво на Обединети Нации, на Европска Унија, на ниво на сите светски организации“ кажа Пендаровски.

Пендаровски потсети и дека Силјановска Давкова ветува амнестија за луѓето кои на 27 април насилно влегоа во Собранието и се обидоа да убијат пратеници.

„Нивната кандидатка за претседател на државата вели тие сите луѓе ние ќе ги амнестираме првиот ден кога ќе дојдеме на власт. Тоа значи дека ние сме насилниците, а тоа се уставобранителите и патриотите. Не, почитувани пријатели, реалноста и вистината е сосема обратна. Ние се бориме за интересите на Македонија, овде се вистинските патриоти, а таму се оние кои се кочничари на македонската иднина и на иднината на нашите млади генерации“ посочи Пендаровски.