Дејан Гавриловиќ од здружението на потрошувачи „Ефектива“ од Србија, вели дека сѐ уште се актуелни кражбите на пин-кодовите на платежните картички, односно т.н. „либански стапици“, механизам што крадците го поставуваат на банкоматите за да добијат пари од картичките на граѓаните, пренесува „Нова С“.

„Либанската стапица“ е сложена направа и не можете да ја видите кога ќе се приближите до банкоматот, но сепак, главниот проблем со кој се соочуваат клиентите на банките при работењето и користењето на банкоматот е тоа што во некои случаи од нивната сметка се повлекуваат пари без тие претходно да ги подигнат.

„Има чести ситуации кога банкоматот не му пушта пари на клиентот, но ја задолжува неговата тековна сметка за сумата што не ја подигнал. Клиентот се обидува да подигне пари, банкоматот не ги исплаќа и прикажува известување дека трансакцијата е неуспешна, но банката сепак го зема претходно побараниот износ од неговата сметка“, вели Гавриловиќ.

Од друга страна, Гавриловиќ вели дека потрошувачите често се жалат дека банкоматот им ги „голта“ парите при плаќање, т.е. не ја прокнижува сумата, и покрај тоа што веќе ја уплатиле преку банкоматот.

„Кога банкоматот не ви ја регистрира уплатата или ви наплатува пари што не ги платил, во тие случаи се пишува жалба до банката, се враќаат камерите и се истражува случајот. Сепак, колку брзо ќе бидат парите на вашата сметка зависи од банката, но од пракса знаеме дека тие обично реагираат доста брзо и дека на клиентот му се враќаат парите“, изјави Гавриловиќ.