Пациент на Геријатрија паднал од висина и загинал
78-годишен пациент во Специјализираната болница за геријатриска и палијативна медицина „13 ноември“ во Скопје, вчера починал откако паднал од висина, соопшти МВР.
Според полицијата, трагичниот настан бил пријавен вчера во 18:15 часот.
„Во Специјализирана болница за геријатриска и палијативна медицина „13 Ноември“-Скопје, на подрачје на Ѓорче Петров, нивниот пациент М.С.(78) од с.Иванковци, велешко, паднал од висина. Од лекар од итна медицинска помош е констатирана смрт“, наведуваат од МВР.
Во кусото полициско соопштение не се наведуваат повеќе информации за околностите под кои се случил падот на човекот, како ни од колкава висина паднал.
По наредба на обвинител, телото е предадено за обдукција.