Во населеното место Миладиновци во Опптина Илинден денеска е отворена новата детска градинка „Прв чекор“ со капацитет за 75 деца на возраст до 6 години, кои ќе бидат организирани во четири  згрижувачко-воспитни групи. 

– За нас секое дете е важно. Предучилишното образование го поставува темелот на кој што младата детска личност се гради во иден ученик во основно училиште, средно образование и академски граѓанин – изјави министерката за труд и социјала Јагода Шахпаска која присуствуваше на отварањето.

Таа потсети  дека од почетокот на мандатот, покрај денешната во Илинден се отворени и градинките во Сарај и Гостивар, а до крајот на годината планирано  е отворање на градинките во Ресен, Боговиње и на уште четири други.  Шахпаска рече дека Министерството планира до крајот на мандатот на оваа Влада во детските градинки да има опфат од 7.500 нови деца.

–  Илинден е општина во раст. Поширувањето на капацитетот на градинките е особено важно, бидејќи  предучилишните установи се клуч за дружење и социјализација на децата – рече градоначалникот Жика Стојановски.

Тој информираше дека новата градинка е енергетски ефикасен објект кој ги задоволува највисоките стандарди. Вкупната инвестиција на општината и Министерството за оваа градинка изнесува 33 милиони денари, односно околу половина милион евра.