Неможноста на Европскиот совет да постигне консензус за нашата одлука е историска грешка и неправда но ние не се откажуваме и нема да дозволиме чувството на разочараност да не отргне од патот на реформите, рече министерот за евроинтеграции Бујар Османи на собраниската комисија за европски прашања на која се дискутира за неуспехот на нашата земја со недобивањето на датумот за преговори.

-Со одлуката од јуни минатата година го започнавме обврзувачкиот скрининг, сите признанија нè охрабрија да ја очекуваме позитивна одлука. Оваа седница не е сликана за да си честитаме. Неможноста на Европскиот совет да постигне консензус за нашата одлука е историска грешка и неправда. И е Европслиот парламентот го потврди тоа. Чувството на изневереност од страна на ЕУ не смее да нѐ оддалечи од европските вредности, не смее да нѐ оддалечи од патот на реформите, од патот на создавање пријатели од своите соседи, од патот на создавањето на функционално мултиетничко општество, од патот да создавање европска држава, по европски правила, стандарди и вредности, бидејќи нашиот пат бил, нашиот единствен пат е, и останува да биде европската перспектива и од тоа отстапување нема. Немаме право да се предадеме. На маса сме со најмоќните – рече Османи.

Тој објасни дека без разлика на сегашната состојба нашата држава е навистина пример на Балканот за тоа како се гради функционална мултиетничка демократија, со почитување на европските принципи на еднаквост, на солидарност, на компромиси, земја која како ретко која друга може да се пофали дека на правилен начин ги затвори сите поголеми отворени политички прашања, независно дали се тоа односите со соседите или внатрешните односи меѓу различните етнички заедници, меѓу различните политички, социјални или општествени целини.