Унгарскиот премиер Виктор Орбан, кој повторно е избран за претседател на партијата Фидес, рече дека неговата земја ќе остане во Европската Унија (ЕУ), но источните и западните членки на блокот мораат да најдат компромис, пренесуваат агенциите.

– Ние сме членка на Унијата и ќе останеме членка – рече Орбан и додаде дека иако западната и источната половина на Унијата јасно следат различен пат и почитуваат различни вредности, можно е да се пронајдат начини на соживот и во такви околности.

Во речиси десет години на власт, Орбан често влегуваше во несогласувања со Брисел, на пример поради неговото одбивање да ги прифати мигрантските квоти според планот на Брисел, а добиваше критики и поради неговото настојување да ги контролира медиумите, судството и академската заедница. Во тој контекст тој и порача на „другата страна“ да ја запре практиката на отворени напади на владите на поранешните комунистички земји од средна и источна Европа.

– Ние на нив не им испраќаме платени политички активисти, затоа тие нека ги повикаат нивните од средна Европа – истакна унгарскиот лидер.

Орбан додаде дека „буџетот на Унијата не би смеел да биде користен за финансирање на групи и медиуми кои ги фаворизираат либералите и мигрантите, и на оние кои им служат на нив“.

– Ако навистина сакаме Европа да ја одржиме заедно, треба да ја запреме таа практика. Ова е наша земја, наш дом и наш жиот и за тоа може да одлучуваат само Унгарците – потенцираше Орбан.