Општина Центар распиша повик за субвенција на дополнителна опрема за велосипед, е-велосипед и е-тротинет
Општина Центар распиша Јавен повик за доделување на поединечна субвенција за жителите на општината, за купување на дополнителна опрема, односно седишта за деца или кациги за велосипед, е-велосипед и е-тротинет во 2023 година, известуваат од Општина Центар.
Ќе се субвенционира 30 отсто од цената за купување на дополнителна опрема, односно седишта за деца или кациги за велосипед, е-велосипед и е-тротинет, но најмногу до 1.000 денари, а ќе трае до исцрпување на средствата што се предвидени во Буџетот на општината, како што се наведува во соопштението, по принципот „прв дојден – прв услужен“.
-Преку проектот Центар на точак само минатата година субвенциониравме 134 жители кои купија нов велосипед и 7 за нов е-тротинет, а од оваа година за првпат во државата ќе се субвенционира и купување на дополнителна опрема за велосипеди и е-тротинети, посочи градоначалникот на Општина Центар, Горан Герасимовски.
Секој полнолетен жител на Општина Центар што купил дополнителна опрема, односно седишта за деца или кациги за велосипед, е-велосипед или е-тротинет има право да аплицира на Јавниот повик, ретроактивно од 1.8.2023 година.
Потребните документи за аплицирање на Јавниот повик за доделување на поединечна субвенција се објавени на веб- страницата на Општина Центар хттпс://њњњ.центар.гов.мк/?п=19005. Барањата со комплетна документација треба да се достават во Архивата на Општина Центар, барака бр.6, секој работен ден од 09:00 до 15:00 часот. Правото на субвенција е еднократно. Сите дополнителни прашања граѓаните може да ги постават на телефонските броеви 02/3203-600 и 02/3203-693.