Директорот на Оксфордската студија која ја испитува вакцината за коронавирусот вели дека постои „мала шанса“ вакцината да биде подготвена пред Божиќ.

Ендру Полард, кој е на чело на тимот што ја истражува вакцината, пред Комитетот за наука и технологија изјави дека е „оптимист“ дека Универзитетот во Оксфорд може да ги претстави резултатите и дали вакцината ќе се пушти во употреба пред крајот на годината, пренесува „Sky News“.

На прашањето дали вакцината ќе биде готова до Божиќ, тој изјави: „Постојат мали шанси да се случи тоа, но засега не знаеме“.

„Нашите испитувања се само еден од многуте истражувања што се спроведуваат низ целиот свет, од кои некои може да бидат завршени пред крајот на годината“, додава тој.

Сепак, тој рече дека временската рамка за примена на вакцините сè уште останува нејасна. Вакцината за коронавирус сè уште не е одобрена и ќе мора да помине низ многу регулативи за да се потврди дали е безбедна и ефикасна пред да почне да се користи.

Постојат две водечки компании кои во моментов се во доцни фази на клинички испитувања и кои можат да испратат клинички податоци до регулаторните тела во рок од неколку недели.

Станува збор за потенцијални вакцини од германската компанија „BioNtech“ и американската фармацевтска компанија „Pfizer“, како и Универзитетот во Оксфорд и „AstraZeneca“.

Полард изјави дека Агенцијата за храна и лекови на САД утврдила дека вакцината за да биде ефикасна треба да биде делува во најмалку 50% од случаите. Но, засега нема податоци за ефикасноста на кој било кандидат за вакцина, пренесува „Sky News“.