Официјално најстариот човек на светот ја откри тајната на својата долговечност: Секој петок јаде исто јадење
Најстариот човек на светот, 111-годишниот Англичанец Џон Алфред Тинисвуд вели дека тајната на неговиот долг живот лежи во среќата, умереноста, но и во едно јадење што го јаде секој петок – риба со компири.
Тинисвуд е новиот носител на титулата најстар човек на светот според Гинисовата книга на светски рекорди, а таа титула ја освои по смртта на рекордерот Хуан Висенте Перез, кој почина на 114 години мината недела.
– Ако премногу пиете, премногу јадете или премногу одите, ако што било премногу правите, тоа на крајот нема да биде добро за вас – изјавил Тинисвуд за Гинисовата книга на рекорди, додавајќи дека на крајот сè се сведува на среќата.
– Тоа е чиста среќа. Или живееш долго или живееш кратко, и тука нема многу што можеш да направиш – рекол тој.
Најстариот човек на светот секој петок се почестува со ова, за многу Британци омилено јадење, кое дури се смета за британско национално јадење. Во прашање е риба со компири.
Во Велика Британија за ова јадење најчесто се користи бакалар, но може да се подготви и со некоја друга бела риба, како на пример, ослиќ.
Филето риба се потопува во пивско тесто и се пржи во масло, па се сервира со пржени компири и лимон, а во Велика Британија популарен додаток на ова јадење е и грашокот.
Џон е роден во Ливерпул на 26 август 1912 година, тој ја запознал својата сопруга Блодвен на танц во градот, а се венчале во 1942 година, за време на Втората светска војна. Една година подоцна, тие добиле ќерка. Работел како сметководител за Шел и БП додека не се пензионирал во 1972 година. Среќната двојка била во брак 44 години. Неговата сопруга починала во 1986 година.