Шефот на Силверстоун ги предупреди демонстрантите кои протестираат против употребата на фосилни горива дека ќе ги загрозат сопствените животи доколку протестираат на Ф1 трката за Големата награда на Британија.

Активистите веќе таргетираа некои меѓународни натпревари во снукер, рагби и крикет на Островот годинава и предизвикаа прекини.

Зборувајќи пред неделната трка, управниот директор на Силверстоун, Стјуарт Прингл, рече:

– Не го ставате вашиот живот во опасност кога седите на маса за снукер или протестирате на изложба на цвеќиња. Патека за трки со Ф1 автомобили не е место за протести. Тоа е извонредно опасно и луѓето ќе ги загрозат животите ако одат таму. Не ставајте го вашиот живот во опасност. Ова не е место да седите на асфалтот.

Петмина демонстранти го „нападнаа“ минатогодишното британско гран-при, откако упаднаа на патеката, па седнаа за време на воведниот круг.

Силверстоун сезонава очекува рекордни 480.000 посетители да присуствуваат во текот на претстојниот викенд, од кои 140.000 фанови ќе бидат на трката в недела.