Услугата Домашна нега и помош на стари лица од подрачјето на општините Бутел и Чучер Сандево почнува да се спроведува од денеска, соопшти Министерството за труд и социјална политика.

Услугата е наменета за лица од над 65-годишна возраст, кои не се во состојба самите да се грижат за себе.

Главна цел на новата услуга е да го подобри и одржи здравјето на старите лица од подрачјето на општините Бутел и Чучер Сандево и да им помогне во извршувањето на активностите од секојдневниот живот.

Развојот на оваа социјална услуга, како дел од спроведувањето на сеопфатната социјална реформа во земјава, е финансиран од Проектот за подобрување на социјалните услуги, што го спроведува Министерството за труд и социјална политика, со поддршка на Светска банка.