Пеп Гвардиола доби ново признание поради доминацијата на неговиот Манчестер сити во Премиер лигата. Гвардиола кој ја врати шампионската титула во „синиот“ дел од Манчестер, е прогласен за тренер на годината во изборот на Асоцијацијата на тренери (менаџери) во Англија.

Манчестер сити под водство на Пеп Гвардиола изминатата сезона постави нов рекорд по бројот на победи по ред. Во периодот од 3. јануари па се до 2. март оваа година, победија на 13 натпревари по ред и во тој период ја создадоа предноста на табелата која на крајот им ја донесе победата.
Исто така Манчестер сити направи серија од 21 победа во сите натпреварувања, како и серија од 12 победи по ред на гостувањата.
Покрај Гвардиола, во трка за признанието тренер на годината беа уште и Марсело Биелса од Лидс, Дејвид Мојерс од Вест Хем, Брендан Роџерс од Лестерс и Оле Гунар Солскјер од Манчестер јунајтед.