Нови американски санкции против руската платеничка група „Вагнер“
Американското Министерство за финансии одлучи да воведе дополнителни санкции за руската приватна воена компанија „Вагнер груп”, која е вклучена во борбите во Украина.
Портпаролот на Советот за национална безбедност на Белата куќа, Џон Кирби, денеска најави дека американското Министерство за финансии ќе ја означи групата „Вагнер“ како „значајна транснационална криминална организација“.
Белата куќа, исто така, објави фотографии на кои се гледа како на Русија ѝ се испорачува пратка оружје од Северна Кореја, за која рече дека има за цел да ги зајакне силите на групата „Вагнер“ на боиштата во Украина.
Американската влада објави и фотографија од 18 ноември, за која тврди дека покажува руски железнички вагони кои патуваат меѓу Русија и Северна Кореја.
Администрацијата на американскиот претседател Џозеф Бајден беше првата што ја обвини Северна Кореја дека ја снабдува Русија со оружје.