Ова што сега се случува во Алијанса за Албанците не е нешто ново, тлее од поодамна уште откако партијата одлучи да стане дел на владината коалиција, чекор со кој не се согласуваше Таравари, вели претседател на инситутот Бирс, Џелал Незири во вечерашното гостување на Топ Тема на ТВ Телма.

Тој истакна дека тогаш Таравари претпочитал повеќе да се унифицира, обединува албанската опозиција, но Села, како претседател на собранието на партијата, донел одлука со која според статутот, претседателот на партијата и претседателството се обврзани да ја испочитуваат и имплементираат.

– Така се поставени работите внатре во Алијанса, каде што централна улога има собранието. Тоа е орган кој носи одлуки, усвојува политики, а претседателот и претседателството се таа извршна власт внатре во партијата која треба да ги извршува“, истакна Незири.

Тој додава дека Таравари, не по своја волја, станал еден од лидерите кои беа дел од владината коалиција и до овој момент или до пред неколку дена инсистирал Алијанаса да биде дел или да се приклучи на опозициската коалиција на албанските партии наречена Европски сојуз за промени кои не одеа со тоа што беше основен договор меѓу Алијанса и ДУИ во 2022 година, кога пристапија на владината коалиција.

– По сè изгледа, тогашниот договор меѓу Алијанса на Албанците и ДУИ беше не само да настапат заедно во владината коалиција, туку таа соработка потоа да прерасне и во предизборна коалиција, вели Незири.

Според него тука кулминирале несогласувањата кои доведоа до моменталната ситуација.