Пожарите на Родос и Крф, сè уште не се ставени под контрола. И додека противпожарните екипи неколку дена водат битка со огнената стихија, попладнево избија нови пожари во близина на градовите Ламија и Велестино во централна Грција, а превентивно беа евакуирани населени места, јави дописничката на МИА од Атина.

Портпаролот на противпожарната служба на Грција Јанис Артопиос попладнево информираше дека пожарот кај Велестино брзо се проширил и затоа преку бројот 112 за итни случаи беше испратена порака за превентивна евакуација на две села и индустриската зона на Волос.

Иста порака добиле и жителите на северниот дел на грчкиот град Ламија за превентивна евакуација кон централниот и јужниот дел на градот.

Пожарите се гасат со копнени и воздушни сили.

-Битката со катастрофалните пожари продолжува на многу фронта и денеска сите сили на цивилната заштита функционираат под екстремни услови, со оглед на тоа дека денешниот ден е најтежок летово, потенцираше портпаролот на противпожарната служба на Грција.

Посочи дека во битката со огнената стихија помагаат пожарникари и средства од 11 земји.