Фото: Freepik

Не ги сакате животните? Студија ја открива темната страна на вашата личност

Филмските негативци, како што се Патрик Бејтман од „Американски психопат“ или Виланел од ТВ серијата „Убивање на Ева“, често се прикажани како злоупотребуваат животни. Иако на многумина може да им изгледа како сценариско клише, новото истражување покажува дека оваа особина не е само фикција. Научниците сега тврдат дека може да открие вистински темни страни на личноста, пишува „Дејли мејл“.

Истражувачите од Универзитетот во Белград откриле дека луѓето кои покажуваат знаци на психопатија имаат поголема веројатност да веруваат дека животните вредат помалку од луѓето. Овие луѓе често покажуваат импулсивност, склоност кон лажење и површен шарм, а може да бидат и посклони кон понижување, па дури и злоупотреба на животни. Студијата, исто така, открива дека оние кои ги мразат животните честопати уживаат во предизвикување болка на другите, што е белег на садизам. Експертите се јасни – луѓето со мрачен карактер честопати немаат сочувство ниту за животните.

Научниците предупредуваат дека насилството кон животните често е поврзано со семејно насилство, а понекогаш дури и со убиство. Тие веруваат дека секоја форма на злоупотреба на животни може да биде важен индикатор за антисоцијално однесување, и кај децата и кај возрасните.

Што е темната тетрада?

Студијата се фокусираше на таканаречената темна тетрада, збир од четири негативни особини на личноста: нарцизам, макијавелизам, психопатија и садизам.

Нарцизмот вклучува чувство на грандиозност и недостаток на емпатија. Макијавелизмот се базира на манипулација и експлоатација на другите. Психопатијата се карактеризира со антисоцијално однесување и рамнодушност кон чувствата на другите, додека садизмот означува уживање во нанесувањето болка и страдање.

Во првиот дел од студијата учествуваа 369 луѓе кои пополнија прашалници за нивните особини и ставови кон животните. Резултатите покажаа дека луѓето со поизразени особини на психопатија и садизам имале поголема веројатност да веруваат дека луѓето вредат повеќе од животните.

Специзам – невидлива предрасуда

Специзмот е ставот дека луѓето се поважни и повредни од другите животни. Ова го вклучува верувањето дека страдањето на животното е помалку важно од страдањето на луѓето. На пример, на некои луѓе им е трогателна приказната за злоставувано куче, но во исто време не се вознемирени од фактот дека јадат животни за кои чувствуваат исто толку силно.

Истражувачите откриле дека психопатијата и садизмот се поврзани и со помала подготвеност да се помогне на животните. Макијавелизмот бил донекаде поврзан со поголема консумација на месо, додека нарцизмот не играл значајна улога.

Емпатијата е спротивна на темните особини

Во вториот дел од студијата, во која учествувале 234 лица, истражувачите откриле дека психопатите имале поголема веројатност да веруваат во општествените хиерархии, во кои луѓето се над животните. Спротивно на тоа, луѓето со развиена емпатија покажале поголемо сочувство кон животните.

Авторите заклучуваат дека емоционалната студенило, егоцентризмот и чувството на супериорност што ги придружуваат темните тетрадни особини природно водат до намалена грижа за другите, вклучително и животните.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 100 ДЕНАРИ

Видео на денот